لقد اوشكت ثورتك على الفشل..يرجى اعادة شحن الضمير

وبعدين؟ وبعدين فينا بجد؟ لحد امتة هيبقى الوضع على ما هو عليه وعلى المتضرر انه يشرب من البحر؟
هو كدة احنا دايما, دايما لازم نغلط الغلطة الى بيغلطها الحرامى علشان يتكشف فى الاخر, بس غلطتنا احنا
زى الحرامى الى ساب بطاقتة فى البنك الى سرقة وفى الاخر زعل لانه اتمسك
كنا فاكرين ان العيب فى النظام..والعيب فى الفساد..والعيب فى مبارك وجرانة وعز وجمال
لكن للاسف الحقيقة الى احنا بنلف حواليها..وعارفنها كويس..ان العيب فينا احنا
الازمة مش ازمة فساد..الازمة ازمة ضميرررررررر
واحنا ولله الحمد الضمير عندنا رصيدة خلص..ومفيش حد بيبيع كروت لشحن الضمير..لحد ما خلصت فترة السماح..ومفيش صلاحية مدى الحياة
قولنا النظام فاسد..وعاوزين ثورة.. النظام بياكل الحقوق ويتعدى عليها..النظام فسد الشباب وعملفيهم..النظام عمل..النظام خلى..النظام سوى..
طب ادى النظام مشى..ادى الحجة الى كنا مسكينها راحت
عملنا احنا اية؟ اقولكو عملنا اية؟؟
الاف من حالات التعدى على الارض الزراعية على مستوى الجمهورية.. الاف من الادوار المخالفة على مستوى الجمهورية
الاف من الامتار الى تم التعدى عليها من مساحة النيل..
للاسف الى اخدناة من الثورة دى شئ واحد.. هو فرحة اليومين الى بعدها

وعلى راى نجاة ما بتقول

"عمر الهنا قصير" وانا احب اضيفلها "مصر عمرها ما هتتغير"

اصل فى الزحمة..بينقلب الفرح الى جنازة..وفى الزحمة بينقلب الحج الى موت على الارض
وفى الزحمة تنقلب الثورة الى الفوضى.. حتى اننا فى يوم ممكن نقول..ولا يوم من ايام الفساد
ولا يوم من بلطجة امن الدولة..
لاننا شعب زى ما بيقولوا عصاية تفرقنا وزمارة تلمنا
زمان كان عصاية النظام بتفرقنا.. ودلوقتى زمارة الثورة بتلمنا
وفي الزحمة بتكون الغلبة لأعلي صوت وأقوي جسما والأكثر
بلطجة.. وتكون الهزيمة والخيبة للأرجح عقل والأحسن خلق والأهدأ نفس والأخلص
قلب.. في الزحمة والدوشة محدش يقدر يميز بين الخبيث والطيب
والكاتب والكاذب..والثائر والداعر..ومنعرفش نختار حاجة ولا نفرز ولا ننقى وساعتها بتكون كل انفعالاتنا
بالعدوى مش بالاقتناع
عملنا اهداف ثورتنا..اننا عاوزين نغير النظام..بس هل احنا فعلا غيرنا النظام..
ولا المفروض نسال نفسنا الاول هو اية النظام؟؟

النظام الريس والمجلس المزور وامن الدولة واقسام الشرطة..
ولا يمكن النظام دة الى هو العلاقة الى بتحكمنا والى بتربطنا ببعض.. وفى
تعاملاتنا مع بعض ومع ربنا
واذا كانت العلاقة دى اصلا فاسدة..يبقا النظام محتاج يتغير
يبقى انا هنا عندى تعريفين للنظام الريس والمجلس المزور وامن الدولة واقسام الشرطة وتعاملهم مع الناس
والنظام الى هو الاخلاق ومراعاة ربنا فى كل حاجة والضميررررررررررر

طب ما تيجى نسال نفسنا هو دة حاجة ودة حاجة ولا الاتنين مرتبطين ببعض
اعتقد اننا لو غيرنا التانى يبقا بدون شك الاولانى كان هيتغير لان الله لا يغير ما بقوم حتى يغيروا ما بانفسهم
انما لو غيرنا الاولانى مش شرط ان التانى يتصلح.. بس استنوا هو احنا غيرنا النظام الاولانى.. ولا احنا غيرنا وشوش بس؟؟؟
راح عواجيز وجم عواجيز مكانهم.. بيفكروا بنفس العقلية ونفس الاسلوب العقيم..

هو احنا اسقطنا ديكتاتورية.. ودلوقتى كل فئة شغالة الله ينور علشان تفرض دكتاتوريتها هى
الدكتاتورية مش بس فى برلمان.. ولا فى رئاسة جمهورية..انما فى الشارع..وفى العقول..
كلة دلوقتى بينط ع المنصة..كلو عاوز يخطب كلة عاوز يوصل زى النظام السابق ما وصل
وكلة بيخطب مع بعضة.. علشان كدة محدش سامع حاجة ولا حد فاهم حاجة..
النظام السابق دمر كل حد صاحب عقل ومخ.. وكل صاحب قلب وضمير.. وكل صاحب موهبة وإبداع

واظهر أهل التلات ورقات وكذابين الزفة والى بيشتروا المناصب بفلوسهم.. وأطلق أيد الحرامية والبلطجية والصيع واختار للمواقع المحاسيب وبتوع الكوسة والوساطات..

كل ثورة في العالم بيتولد معها زعماءها ومفكريها ودعاتها..

لكن ثورتنا كشفت خيبيتنا لان 30 سنة اتقضى على كل مبدع وكل

صاحب ضمير وكل انسان عنده مخ..ولما خلصوا ال30سنة "بانت لبتنا".. فمصر

خاوية علي عروشها.. لا شوفنا حد عالم ولا زعيم ولا صاحب نظرية ولا انجاز..

مفيش غير البهلوانات الى بيتنطوا فى كل حتة وبمختلف الشعارات..تلاقيهم فى كل حتة.. فى التليفزيونات والشوارع..

وهما منافقين.. وعارفين انهم منافقين..واحنا عارفين انهم منافقين..

لان المشكلة لاثورة ولا فساد ولا نظام.. المشكلة مشكلة ضمير واخلاق ودين وربنا الى احنا مش شايفينة

والى اختصرنا دينه فى المادة التانية فى الدستور الى مش بتطبق اصلا
لكن احنا كدة..لازم نعمل لنا صنم او شماعة..عملنا

صنم النظام السابق وعبدناه..واتحججنا بيه على كل حاجة سودة كانت بسبب قلة

ضميرنا ودينا الى سبناة.. وبعد ما اتكسر صنم النظام السابق .. كان لازم

نعمل صنم الثورة ونعبده..لاننا لو معملناش صنم وعبدناه

هنعرف ربنا ونعبدة.. وهنعرف ونعترف ان
العيب فينا وفى ضمير كل واحد ماشى فى الشارع او راكب تاكسى او بيقرى كلامى
او نايم او رايح الدرس او فى شغلة..او..او..او..
وهنعترف اننا الغلطانين وان البداية من جوانا مش من براانا
وان الثورة الى بجد هتكون فى عقل وضمير كل واحد وواحدة
اتمنى نعرف دة بسرعة.. وتيجى ثورة بجد تسمعنا دة..قبل ما نسمع جملة
عفوا لقد نفذ ضميركم